Esport Federation Cambodia

E-Sports កម្ពុជាធ្វើសិក្ខាសាលាបកស្រាយឱ្យច្បាស់ពីកីឡារបស់ខ្លួន

Monday, May 23rd, 2016

ដោយមានការយល់ច្រឡំច្រើនពីកីឡា E-sport ពីសំណាក់មហាជនទូទៅ កាលពីម្សិលមិញនេះសហព័ន្ធកីឡាអេឡិចត្រូនិកកម្ពុជាបានធ្វើសិក្ខាសាលាបកស្រាយឱ្យកាន់តែច្បាស់ហើយកាលពីម្សិលមិញនេះ ដោយមានការចូលរួមយ៉ាងច្រើនកុះករពីអ្នកសារព័ត៌មានពីគ្រប់ស្ថាប័ន។

e-sport cambodia7

ពិធីសិក្ខាសាលា

លោក ជី សិលា ប្រធានសហព័ន្ធកីឡាអេឡិចត្រូនិកកម្ពុជាបានបញ្ជាក់ថា E-sports ជាប្រភេទកីឡាបច្ចេកវិទ្យាទាន់សម័យមួយ ដែលជួយខាងស្មារតីរបស់យុវជន ក៏ដូចជាអាចធ្វើឱ្យពួកគេចេះសហការគ្នាផងដែរ។ វាមិនដូចអ្វីដែលមហាជនគិត និងយល់ច្រឡំថា វាជាល្បែងស៊ីសងនោះទេ ព្រោះកីឡាមួយនេះមានច្បាប់ក្បួនត្រឹមត្រូវ ដែលអាចឱ្យអ្នកលេងមានគំនិតច្នៃប្រឌិតនិងភាពវ័យឆ្លាត។

e-sport cambodia1

លោក ជី សិលា

ទន្ទឹមគ្នានេះដែរឯកឧត្ដម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានលើកលើកដែរថាកីឡា E-sports មានតាំងពីយូរមកហើយនៅតាមបណ្ដាប្រទេសជឿនលឿន ព្រោះវាជាកីឡាដែលតម្រូវឱ្យកីឡាករម្នាក់ៗចេះប្រើកុំព្យូទ័រឱ្យស្ទាត់ជំនាញ។ ខណៈដែលកម្ពុជាវិញ ទើបតែមានប្រភេទកីឡាមួយនេះប៉ុន្មានឆ្នាំនេះនោះទេ ប៉ុន្តែកម្ពុជាអាចមានកីឡាករល្អៗអាចប្រជែងជាមួយប្រទេសដទៃបាន ហើយបានលទ្ធផលល្អថែមទៀត។ ដូច្នេះសូមមហាជនទូទៅ កុំយល់ច្រឡំថាវាជាល្បែងស៊ីសងអី ព្រោះកីឡានេះក៏អាចធ្វើឱ្យប្រទេសដទៃស្គាល់កម្ពុជាច្បាស់ផងដែរ។

e-sport cambodia4

ឯកឧត្ដម វ៉ាត់ ចំរើន

សិក្ខាសាលាកាលពីម្សិលមិញនេះ ក្រៅពីគោលដៅបកស្រាយការយល់ច្រឡំនេះហើយ សហព័ន្ធក៏បានលើកផែនការមួយចំនួនទៀត រួមមានត្រៀមខ្លួនរៀបចំការប្រកួតជើងឯកជាតិប្រចាំឆ្នាំ២០១៦ និងរៀបចំឲ្យក្រុមជើងឯក និងជើងឯកត្រៀមខ្លួនកាន់តែល្អសម្រាប់ចូលរួមការប្រកួតលក្ខណៈអន្តរជាតិនានា នៅឆ្នាំ២០១៦នេះ៕

e-sport cambodia2